Hamlet Prince of Denmark by William Shakespeare

Author:William Shakespeare
Language: eng
Format: epub
Publisher: A sponsored project of the Klingon Language Institute
Published: 1996-08-29T04:00:00+00:00

[Retires and kneels]

polonyuS

joH, SoSDaj pa’Hom ghoS. wanI’ vItu’meH

tugh HaSta’a’DajDaq jISo’’eghneS.

ghaH qunqu’bej ta’be’. ’ej vuD Daja’pu’,

’ej valqu’ vuDlIj: ja’chuqtaHvIS chaH,

SoQchaj tu’be’nIS SoSDaj neH, qar’a’;

SoS SIghtaHmo’ qorDu’. ’ej boQbogh DaqDaq

Hoch DaqnIS vay’. vaj DaH qamej, ta’ quv.

qaSuch, QongDaq DaghoSpa’. ’ej qaSuchDI’

SoHvaD Hoch De’ vIQum.

tlhaw’DIyuS

qatlho’, jawwI’.

[mej POLONYUS]

He’So’ba’ HeSwIj. va, QI’tu’Daq He’ je.

naDHa’ghach wa’DIch ngo’mo’ bechmoH ’oH.

loDnI’ vIchot! qa’’a’pu’vaD jItlhob

vIneHqu’bej vIHechDI’, ’ach jIluj.

vIHechmeH HoSwIj jey jIDIvmeH HoS.

’ej cha’ malja’vaD vumnISwI’ vIrur:

Qu’ wa’DIch’e’ vIwIvnISbogh vIqelDI’,

jIyev, ’ej tugh cha’ Qu’vetlh vIbuSHa’nIS.

loDnI’wI’ ’Iwmo’ jeD quvHa’bogh ghopvam

net tu’chugh je, vaj ram, qar’a’? chal quvDaq

SISbeHba’ bIQ; peDwI’ chIS rurmeH ghopwIj,

Say’moHmeH yap, qar’a’, tugh SISbogh bIQ.

HeS qabHey puSmeH ’oH, qar’a’, pung tu’lu’.

’ej cha’ Qu’ ta’meH, qa’’a’vaD tlhob Hoch,

qar’a’? wIbotlu’meH, mapumruppa’,

pagh, wInoDHa’lu’meH, mapumpu’DI’.

vaj chal vIbejchoH. pIch vIqIlbej rIntaH.

’ach DotlhwIj ngo’ vIleHmeH, chay’ jItlhoblaH?

“jIchotmeH jIquvHa’ ’e’ yInoDQo’.”

DuHbe’. mIp law’ vIghajchoHmeH jIchotpu’.

’ej mIpmeyvetlh vIpoltaH: ta’ mIv’a’,

Hoch’e’ vItulbogh je, ta’be’nalwI’ je.

chay’? toH, wej HeSDaj pop ghajQo’chugh vay’,

vaj ghaH noDHa’laH’a’ ruvpIn? jIchID:

pIj qo’vam mIwmey qalDaq, ruv lujotlhlaH

DIlbogh HeSwI’ DeQghopqoq. ’ach veqlarghvaD

moSlaHlaw’ pagh. pa’ tojlaH pagh ’oghwI’.

pa’ chavmeymaj Dotlhna’ luleghlaH Hoch.

’ej pIchmeymaj Ho’ QuchHey je DIbej

net ra’taHvIS, mapum’eghchu’ net raD.

tlha’ nuq? ratlh nuq? toH, vay’ vIchavlaHchugh

jIpayDI’, vaj vInIDchoH. SuH, vInID!

Hoch chavlaHlaw’ paywI’ jay’! ’ach nuq chavlaH

paylaHbe’wI’? baQa’, Dotlh ’It! baQa’,

Hegh rurbogh tIqwIj qIjqu’’e’! baQa’,

qa’wI’’e’ vonlu’bogh! bItlhabqa’meH

bInoghDI’, vaj Dubaghqu’choH chon jan!

HIQaH, boQqa’pu’! SuH, jInIDqu’jaj!

peSIH, qIvDu’wIj mul! baS tlhogh Daghajlaw’,

tIqwIj. yItun. ghu to’waQmey yIrur.

tugh QaQjaj Hoch.

Download

Copyright Disclaimer:
This site does not store any files on its server. We only index and link to content provided by other sites. Please contact the content providers to delete copyright contents if any and email us, we'll remove relevant links or contents immediately.